Miðar á Ísland - Kýpur að seljast upp

Alls hafa rúmlega 8 þúsund miðar selst á landsleik Íslands gegn Kýpur í undankeppni HM í knattspyrnu karla. Leikurinn fer fram þann 11. október á Laugardalsvelli.

Þórir Hákonarson, framkvæmdastjóri Knattspyrnusambands Íslands, segist ekki muna eftir öðru eins, að næstum sé uppselt mánuði fyrir leik.

„Það fór gríðarlega mikið í dag,“ segir Þórir og hafa miðar selst vel bæði á netinu og utan þess. „Þetta er alveg ótrúleg sala. Ég held að þetta hafi bara aldrei verið svona.“

Þórir þorir ekki að spá til um það hvenær selst upp á leikinn en segir það hugsanlegt að það losni um einhverja miða á morgun. „Það eru frátekin sæti fyrir Kýpurmenn og við eigum enn eftir að fá staðfestingu frá þeim. Það gæti því verið að það færi eitthvað af þeim sætum í sölu á morgun.“

Leikurinn er síðasti heimaleikur Íslands í riðlakeppninni en liðið er í öðru sæti í sínum riðli.