Mjög erfið ákvörðun

„Hún hefur staðið sig vel undanfarin ár en mér fannst á þessu ári að hún hefði ekki náð að spila á sama styrkleika og undanfarin ár, bæði með landsliðinu og félagsliðinu. Hún spilaði ekki síðustu tvo leiki Chelsea-liðsins og er dottin út úr liðinu þar,“ sagði Sigurður Ragnar um fjarveru Eddu Garðarsdóttur frá hópnum.

„Þetta var mjög erfið ákvörðun sem ég tilkynnti henni í gærkvöldi. Hún tók því ekki vel enda mikil keppnismanneskja. Ég verð samt að vera trúr minni sannfæringu um hvaða 23 leikmenn eru bestir í liðið í dag. Edda var í samkeppni við góða miðjumenn. Ef fólk lítur á hópinn er erfitt að segja hvaða miðjumaður eigi að detta út fyrir hana. Það er mikil samkeppni og ég valdi þá 23 leikmenn sem mér finnst vera bestir í dag.“

Edda er orðin 34 ára gömul og hefur spilað 103 landsleiki. Sigurður útilokar ekki að hún eigi eftir að spila fleiri landsleiki síðar.

Óvissa með Þóru og Sif

Landsliðsþjálfarinn valdi tvo meidda leikmenn í hópinn, markvörðinn Þóru B. Helgadóttur og varnarmanninn Sif Atladóttur. Sigurður vonast til þess að þær verði búnar að jafna sig í tíma.

„Ég er búinn að velta þessum hópi fyrir mér í langan tíma og hann hefur eðlilega breyst aðeins. Valið var samt erfitt og það var sérstaklega erfitt að velja núna því það er ansi mikið undir hjá okkur,“ sagði Sigurður, en hann skilur líka framherjann efnilega Söndu Maríu Jessen eftir heima.

„Hún hefur verið með okkur og væri eflaust í hópnum ef hún væri búin að finna sitt gamla form. Hún hefur verið mikið meidd og er ekki alveg komin í sama stand og áður.“

Það er einn nýliði í hópnum og það er Stjörnustúlkan efnilega, Anna Björk Kristjánsdóttir. „Hún er hafsent og staðið sig mjög vel í sumar. Er reyndar aðeins meidd núna en á að ná sér. Við viljum hafa aukahafsent í hópnum. Katrín Jóns og Glódís Perla eru þarna og svo Sif sem er tæp. Hún er að spila alla leiki með Glódísi, þær þekkja hvor aðra og eru að spila þrusuvel.“

Gengi landsliðsins á árinu hefur ekki verið gott og er lítil ástæða til bjartsýni miðað við það. Aðeins einn leikur af sjö á þessu ári hefur unnist.

Sigurður Ragnar segir það ekki skipta öllu máli og hann segir að möguleikar Íslands í riðlinum liggi í leikjunum gegn Noregi og Hollandi. Það verði aftur á móti við ramman reip að draga gegn ógnarsterku liði Þýskalands.

„Markmið okkar er að komast upp úr riðlinum og í átta liða úrslit. Það er mjög krefjandi markmið enda eru þetta hörkulið sem við erum að mæta. Leikirnir gegn Noregi undanfarin ár hafa verið mjög jafnir. Það er erfiðara að tala um Holland enda höfum við aðeins spilað einu sinni við þær síðan ég tók við. Sá leikur endaði með jafntefli.“