Obama býður repúblikönum samvinnu

Barack Obama Bandaríkjaforseti boðar aðgerðir í mörgum umdeildum málum, svo sem innflytjendamálum, skattamálum, skotvopnamálum og loftslagsmálum. Þar bauð hann andstæðingum sínum í Repúblikanaflokknum byrginn, en bauð jafnframt upp á möguleika til samvinnu.

Mesta áherslu lagði hann þó á efnahagsmálin, aukinn hagvöxt og minni fjárlagahalla, án þess þó að það bitnaði á þeim sem höllum fæti standa.

„Við getum ekki beðið eldri borgara og verkafólk að taka á sig alla byrðina sem fylgir því að draga úr fjárlagahalla en krefjast jafnframt einskis af hinum auðugustu og valdamestu,“ sagði Obama í stefnuræðu sinni, sem hann flutti seint á þriðjudagskvöld. Þetta er fyrsta stefnuræða hans á seinna kjörtímabilinu.

Öfugt við það sem algengt er að forsetar Bandaríkjanna geri í fyrstu stefnuræðu seinna kjörtímabils síns hafði Obama sáralítið að segja um utanríkismál að þessu sinni.

Hann kynnti þó áform um að kalla ríflega helming bandaríska herliðsins í Afganistan heim innan árs. Hamid Karzai, forseti Afganistans, fagnaði þessu í gær. - gb