FBI að störfum í Afríku

Bandarískar sérsveitir gerðu í gær atlögu að tveimur hátt settum hryðjuverkamönnum í Afríku. Annar var einn af æðstu mönnum íslömsku hryðjuverkahreyfingarinnar al-Sjabab í Sómalíu, en heimildum ber saman um að líklega hafi mistekist að ráða hann af dögum.

Tilefnið var hryðjuverk í verslunarmiðstöð í Nairobi á dögunum, en þar myrtu liðsmenn al-Sjabab 68 manns.

Bandarísk stjórnvöld óttast að samtökin geri sambærilega árás í Bandaríkjunum og eftir viðburðina í Keníu sendi bandaríska alríkislögreglan, FBI, mikinn mannafla til Keníu í þeim tilgangi að aðstoða þarlend stjórnvöld við rannsókn málsins.

Í Líbíu var al-Quaeda-leiðtoginn Abu Anas al-Libi tekinn höndum í gær, en hann er talinn hafa staðið á bak við sprengjuárásirnar á sendiráð Bandaríkjanna í Keníu og Tanzaníu árið 1998.

John Kerry, utanríkisráðherra Bandaríkjanna, segir að Bandaríkjamenn muni halda áfram að elta uppi öfgamenn.