Metfjöldi sá Dempsey spila með Seattle

Clint Dempsey fór frá Tottenham til Seattle Sounders í sumar og það er mikil stemning í Seattle fyrir fyrirliða bandaríska landsliðsins.

Rúmlega 67 þúsund manns mættu á völlinn í Seattle í gær til þess að sjá Dempsey og félaga spila gegn Portland í MLS-deildinni. Þetta var fyrsti heimaleikur Dempsey fyrir Sounders.

Þetta er besta mæting á knattspyrnuleik í Seattle frá upphafi og toppar mætinguna frá því 2011 er Man. Utd lék æifingaleik gegn Sounders.

Þetta er líka næstabesta mæting á leik í MLS-deildinni frá upphafi en LA Galaxy á metið. Það mættu eitt sinn tæplega 70 þúsund manns á leik hjá þeim árið 1996.

Áhorfendur héldu glaðir heim á leið því Seattle vann leikinn, 1-0.