Íslendingur dúxaði í Yale-háskólanum

„Ég var mjög lánsamur að hljóta styrki frá bæði Fulbright og stofnun Leifs Eiríkssonar. Þessir styrkir gerðu mér námið kleift,“ segir Arnaldur Hjartarson, 29 ára lögfræðingur sem nýverið lauk framhaldsnámi í lögfræði við Yale Law School. Hann hlaut hæstu mögulegu einkunn úr öllum kúrsum í náminu.

Yale Law School er án vafa ein af sterkari lagadeildum í heiminum. Skólinn hefur afar gott hlutfall af fjölda kennara miðað við fjölda nemenda, reyndar það besta bandarískra lagaskóla. „Kennslan verður fyrir vikið öll mun persónulegri. Það eykur líka pressuna á að vera ávallt vel undirbúinn því maður verður alltaf að geta tekið þátt í umræðum með vitrænum í hætti. Í litlum bekk verður fljótt ljóst ef einhver er illa lesinn,“ segir Arnaldur kíminn.

Í Bandaríkjunum er rík hefð fyrir mikill samkeppni og menn reyna reglulega að mæla eftir ákveðnum leiðum hver sé besti skólinn. Yale Law School virðist almennt tróna á toppnum í slíkum könnunum. „Ég held reyndar að slíkar mælingar séu alltaf dálitið afstæðar. Ég hefði sjálfur verið sáttur við hvern þann skóla þar sem ég sótti um skólavist,“ bætir Arnaldur við.

Bandaríkjamenn hafa ætíð hugsað mikið um slíkar mælingar og af þeim sökum sækja margir sterkustu námsmenn þeirra í laganámið í Yale.

Arnaldur kynntist ýmsu áhugaverðu fólki í skólanum. „Sumir eru alvörugefnir og stefna hátt í stjórnmálum. Þeir vilja jafnvel feta í fótspor fyrrum nemenda á borð við Bill og Hillary Clinton. Aðrir eru skemmtilega flippaðir, til dæmis einn skólafélagi minn sem fjármagnar skólagjöld og lífstíl sinn með stærðfræðikunnáttu sinni. Hann telur spil í spilavítum, eins og í kvikmyndinni Rain Man. Svo var hann fyrrum atvinnumaður í hnefaleikum,“ segir Arnaldur. 

„Svo hafði ég einn kennara sem heitir Amy Chua. Hún er ekki aðeins fræg fyrir lögfræði heldur skrifaði bókina Battle Hymn of the Tiger Mother, þar sem hún lýsti þeim ofurströngu uppeldisaðferðum sem hún beitti á dætur sínar. Bókin var mjög umdeild, og flestir íslenskir foreldrar myndu sennilega gapa af undrun yfir þeim harkalegu aðferðum sem hún beitti, en hún virtist alltaf breytast í mjög indæla manneskju þegar kom að samskiptum við nemendur,“ segir Arnaldur að lokum.