Klámmyndaframleiðandi býður Asprilla vikusamning

Kólumbíumaðurinn Faustino Asprilla sló í gegn í Newcastle-liði Kevin Keegan. Hann var þá með öflugri leikmönnum heims.

Asprilla er orðinn 43 ára gamall í dag og hefur verið iðinn við að lenda í vandræðum. Til að mynda var hann handtekinn fyrir að skjóta með hríðskotabyssu á öryggisverði.

Nú hefur framleiðandi klámmynda í Kólumbíu boðið Asprilla samning. Hann er upp á vikuvinnu og fyrir hana á Asprilla að fá 1,3 milljónir króna.

Klámframleiðandinn birti opið bréf á heimasíðu sinni þar sem Asprilla er boðið starfið.

"Þar sem lífsstíll þinn er villtur og vekur alltaf athygli fjölmiðla þá ákváðum við að gera þér þetta tilboð. Þetta er einstakt tilboð. Við erum sannfærðir að með smá þjálfun getur þú nýtt þér hæfileika sem fólk í Kólumbíu veit að þú býrð yfir," stendur meðal annars í bréfinu.

Asprilla sat nakinn fyrir árið 1993 en hefur enga reynslu á þessu sviði. Hann hefur ekki svarað bréfinu formlega.