Klaassen blómstrar í fjarveru Kolbeins

Davy Klaassen, tvítugur strákur, skoraði þrennu fyrir Ajax í hollensku úrvalsdeildinni í fótbolta í kvöld þegar hollensku meistararnir unnu 4-0 heimasigur á NAC Breda.

Davy Klaassen hefur þar með skorað fimm mörk í síðustu þremur leikjum Ajax-liðsins en hann er að skora þessi mörk af miðjunni. Klaassen skoraði mörkin á 34., 45.+1 og 65. mínútu leiksins.  

Davy Klaassen er að blómstra í fjarveru íslenska landsliðsframherjans. Kolbeinn Sigþórsson er nefnilega enn frá vegna meiðslanna sem hann varð fyrir í fyrri umspilsleiknum á móti Króatíu. Danny Hoesen var fremstur hjá Ajax í leiknum í kvöld.

Spánverjinn Bojan kom inná sem varamaður fyrir Hoesen á 62. mínútu og skoraði fjórða mark Ajax aðeins sex mínútum síðar.

Ajax endaði leikinn manni fleiri eftir að varamaðurinn Joey Suk fékk rautt spjald undir lokin.