Póstburðarmaður skotinn til bana í Bandaríkjunum

Póstburðarmaður í Bandaríkjunum var skotinn til bana á laugardagskvöld þegar hann var að bera út póst á heimili í Maryland.

Maðurinn var 26 ára gamall og hét Tyson Jerome Barnette, en hann var skotinn nokkrum sinnum af stuttu færi með fyrrgreindum afleiðingum.

Lögreglan á svæðinu hefur ekki enn náð að handsama skotmanninn en bandaríska póststofnunin hefur boðið 100.000 dollara fyrir allar þær upplýsingar sem berast lögregluyfirvöldum í Bandaríkjunum um málið og gætu leitt til handtöku.

Yfir 100 samstarfsfélagar mannsins hópuðust saman í gær og kveiktu á kertum til minningar um fórnarlambið.

„Þetta er skelfilegt og maður biður núna fyrir aðstandendum hans,“ sagði Elton Branson, starfsmaður bandarísku póstþjónustunnar, í gær.

„Okkur skilst að maðurinn hafi átt litla stúlku og að ímynda sér að hún eigi eftir að alast upp án föður síns er skelfileg tilhugsun.“