Kom að Eriksson í bólinu með konunni sinni

Ævisaga Sven-Göran Eriksson hefur ekki vakið jafnmikla athygli og sú hjá kollega hans Sir Alex Ferguson. Sagan snertir líka á ólíkum hlutum. Guardian fjallar um málið.

Fyrrum landsliðsþjálfari Englands hefur meðal annars sagt frá því þegar hann samþykkti að taka við Manchester United af Ferguson árið 2002. Sömuleiðis ræðir hann um samband sitt við Nancy Dell'Olio.

Eitt atvik virðist aðeins hafa ratað í norska útgáfu bókarinnar. Þá var Svíinn gripinn í bólinu, reyndar á sófanum, með giftri konu. Norskir lesendur lesa söguna af því þegar Eriksson fór út á lífið með einum af leikmönnum IFK Gautaborgar.

Fór svo að vel fór á með Eriksson og einni vinkonu leikmannsins og æstust leikar heldur. Hins vegar fékk kvöldið ekki hinn fullkomna endi.

„Við vorum kviknakin á sófanum. Hún hafði ekki sagt nokkurn skapaðan hlut um að hún væri gift en allt í einu opnuðust dyrnar og þar var maður í stærra lagi,“ segir Eriksson í bók sinni.

„Hver í fjandanum ert þú,“ rifjar Eriksson upp að eiginmaðurinn hafi sagt. Eriksson sagði að líklega væri best að hann færi og undir það tók eiginmaðurinn.

Svíinn gat ekki tekið veskið sitt, jakka, farsíma og skó með sér. Sem betur fer fann hann körfuboltaskó í stigaganginum. Einn hængur var þar á, skórnir voru í stærð 46 en Eriksson notar skó númer 39. Leikmaðurinn fór svo fyrir hönd Eriksson, náði í eigur Svíans og skilaði skónum.