Ný eyja birtist eftir jarðskjálfta

Þúsundir manna höfðust við undir berum himni í Pakistan í nótt eftir að harður jarðskjálfti reið þar yfir í gær. 

Í hafnarborginni Gwadar tók fólk eftir því að ný eyja var orðin til út af ströndinni þar, skammt frá höfninni. Fjöldi fólks lagði leið sína þangað til að skoða eyjuna, sem að sögn BBC er um 200 metra löng, 100 metra breið og 20 metra há.

Zahid Rafi, yfirmaður jarðfræðistofnunar Pakistans, staðfestir að eyjan hafi orðið til vegna skjálftans, en vísindamenn væru að reyna að átta sig á því hvað hefði gerst.

Hann segir mögulegt að í skjálftanum hafi hreyfing komist á gas undir sjávarbotninum og það hafi þrýst aur og leðju upp. Þá myndist eins konar gervigígur. 

„Þegar svona stór skjálfti myndar þrýsting, þá eru líkur til þess að svona eyjar myndist,” segir Rafi. „Þetta mikill skjálfti neðanjarðar veldur miklum umbrotum.”

Skjálftinn varð í Balúkistan-héraði í suðvestanverðu Pakistan. Hann mældist 7,7 stig og kostaði að minnsta kosti 250 manns lífið. Fjölmörg hús eru rústir einar eftir hamfarirnar.