14 létust í loftárás á skóla

Að minnsta kosti 14 manns létust í morgun þegar sýrlensk orrustuþota varpaði sprengju á skóla á norðanverðu Sýrlandi. Frá þessu greinir á vef CNN. Á meðal hinna látnu eru að minnsta kosti 10 nemendur við skólann.

Tugir annarra særðust í árásinni. Skólinn er staðsettur á svæði þar sem uppreisninni hefur verið haldið í skefjum hingað til samkvæmt upplýsingum frá sýrlenskri mannréttindastofnun. Tala látinna mun að öllum líkindum hækka vegna þess hve alvarleg meiðsl hinna særðu eru. Samkvæmt upplýsingum frá Sameinuðu þjóðunum hafa yfir hundrað þúsund manns látist í borgarastyrjöldinni í Sýrlandi sem hefur nú staðið í yfir 2 ár.

Á morgun, mánudag, fer teymi rannsakenda frá Efnavopnastofnun til Damaskus. Hópurinn stendur frammi fyrir því verkefni að heimsækja nærri 50 staði í því skyni að fjarlægja öll efnavopn sem eru í Sýrlandi. Förin er að sögn embættismanns innan Efnavopnastofnunarinnar hættuleg þar sem að þörf er á að fara í gegnum svæði þar sem að uppreisnarmenn ráða ríkjum. Öryggisráð Sameinuðu þjóðanna styður förina. Í byrjun september var það staðfest að efnavopn hefðu verið notuð í borgarastyrjöldinni.