Stjórn Merkels í hættu

Kristilega sósíalbandalagið (CSU) vann yfirburðasigur í þingkosningum í Bæjaralandi í gær og hlaut hreinan meirihluta.

Þetta eru góðar fréttir fyrir Angelu Merkel Þýskalandskanslara, því CSU er systurflokkur Kristilega demókrataflokksins hennar. Kristilegum demókrötum er spáð góðu gengi í þingkosningum, sem haldnar verða í öllu Þýskalandi um næstu helgi, og gott gengi systurflokksins í Bæjaralandi bendir til að Merkel geti einnig hlotið góða kosningu.

Slæmu fréttirnar fyrir Merkel eru hins vegar þær að Frjálsir demókratar, samstarfsflokkur hennar í ríkisstjórn Þýskalands, náðu ekki manni inn á þing í Bæjaralandi. Þeir fengu minna en fimm prósent atkvæða, og eru þar með komnir undir lágmarkið sem þarf til að ná manni á þing.

Á landsvísu mælast Frjálsir demókratar með um það bil fimm prósent atkvæða, þannig að fari þeir undir markið í kosningum til þýska þjóðþingsins um næstu helgi, þá er samstarf Kristilegra demókrata við Frjálsa demókrata úr sögunni.

Þá kemur til kasta Sósíaldemókrataflokksins, sem gæti komist í þá stöðu að geta valið á milli stjórnarsamstarfs með Merkel til hægri eða með Græningjum og Vinstriflokknum.