Byssumaðurinn var einn að verki

Lögreglan í Washington veit ekki enn hvað varð til þess að Aaron Alexis hóf skothríð í stjórnstöð bandaríska sjóhersins í gær.

Hins vegar þykir orðið ljóst að hann var einn að verki. Ekkert reyndist hæft í grun lögreglu um að tveir aðrir menn hafi tekið þátt í skotárásinni.

Hann myrti tólf manns og lét svo sjálfur lífið í skotbardaga við lögreglu. 

Skotárásin var gerð í húsakynnum sjóhersins í Washingtonborg, ekki ýkja langt frá þinghúsinu og Hvíta húsinu. Hann hafði komið sér fyrir á efri hæð byggingarinnar og skaut þaðan niður á fólk í matsal á neðstu hæðinni.

Alexis var 34 ára, var varaliðsmaður í sjóhernum á árunum 2007 til 2011, en starfaði sem verktaki hjá hernum og hafði því aðgang að byggingunni. Hann hafði kvartað undan sjóhernum og sagðist hafa orðið fyrir mismunun. Hann þótti skapbráður og hafði nokkrum sinnum komist í kast við lögin, og komu skotvopn tvisvar við sögu í þeim útistöðum.

Þetta er mannskæðasta árás í bandarískri herstöð frá því árið 2009 þegar hergeðlæknirinn Nidal Hasan myrti 13 manns í Fort Hood í Texas.

Alexis var með þrjú skotvopn á sér, þar á meðal AR-15 riffil, sem er sams konar vopn og notað hefur verið í tveimur skotárásum í Bandaríkjunum á síðustu misserum.