Skoruðum síðast hjá Þýskalandi fyrir fall járntjaldsins

Óhætt er að segja að lítil ástæða sé til bjartsýni þegar íslenska kvennalandsliðið í knattspyrnu mætir Þjóðverjum. Í það minnsta sé litið til sögunnar.

Síðan Valskempurnar Guðrún Sæmundsdóttir og Ragnheiður Víkingsdóttir skoruðu hvort sitt markið í 3-2 tapi gegn Vestur-Þjóðverjum í vináttuleik í Delmenhorst þann 6. september 1987 hafa þýskir markverði haft það náðugt gegn Íslendingum.

Þjóðirnar hafa mæst tólf sinnum í landsleik og hafa Þjóðverjar haft betur í öll skiptin. Vestur-Þjóðverjar sigruðu í fyrstu viðureign þjóðanna þann 27. júlí 1987. Þá skoraði Keflvíkingurinn Katrín María Eiríksdóttir mark Íslands í 4-1 tapi á Kópavogsvelli.

Þá eru upptaldir allir íslensku leikmennirnir sem skorað hafa hjá Þjóðverjum. Markatalan er 48-3 þeim þýsku í vil. Þó skal haft í huga að í tveimur síðustu landsleikjum þjóðanna, á EM í Finnlandi 2009 og á Algarve 2012, hafa Þjóðverjar unnið nauman 1-0 sigur.

Hafa skal í huga að sagan hefur ekki unnið einn einasta knattspyrnuleik en jafnframt ljóst að takist Íslendingum að uppskera úr leik kvöldsins yrði um sögulegt afrek að ræða.