Kjötframleiðendurnir segjast hafa verið gabbaðir

Hvorki Findus, sem framleiðir vinsælt lasagna, né Comigel, sem selur Findus kjöt í lasagnað, segjast bera ábyrgð á því að lasagnað hafi innihaldið hrossakjöt. Eins og fram hefur komið er grunur um að hrossakjöt og jafnvel kjöt af ösnum hafi verið notað í tilbúna rétti í stað nautakjöts. Vörur hafa verð innkallaðar, meðal annars hér á landi, vegna þessa hneykslis sem skekur nú alla Evrópu.

Forstjóri Comigel segir hins vegar að fyrirtækið geti ekki borið ábyrgð á þessu máli. „Það var svindlað á okkur og það er nú ljóst að vandinn verður ekki rakinn til Findus eða Comigel," segir Erick Lehagre í samtali við danska blaðið Börsen. Findus hafði áður sagt að til stæði að höfða mál gegn Comigel vegna málsins.

Þetta svindlmál vindur sífellt upp á sig og nú er ljóst að ráðherra neytendamála í Frakklandi og landbúnaðarráðherrann munu ræða það við alla hagsmunaaðila í kjötiðnaði í dag.

Fram hefur komið að hrossakjötið umrædda er upprunalega frá Rúmeníu.