Íslendingum fjölgaði um 0,7% á síðasta ári

Hinn 1. janúar s.l. voru landsmenn alls 321.857 og hafði fjölgað um 2.282 frá sama tíma árið 2012. Þetta jafngildir fjölgun landsmanna um 0,7%. Konum fjölgaði nokkuð meira en körlum eða um 1,4% á móti 0,03%.

Þetta kemur fram á vefsíðu Hagstofunnar. Þar segir að fólksfjölgun var á höfuðborgarsvæðinu, en þar voru íbúar 2.081 fleiri 1. janúar en ári fyrr. Það jafngildir 1,0% fjölgun íbúa á einu ári.

Hlutfallslega varð fólksfjölgunin hins vegar mest á Vestfjörðum, þar sem fjölgaði um 1,1%, eða 77 frá síðasta ári. Fólki fjölgaði einnig á Austurlandi, um 78 einstaklinga (0,6%), og um 90 (0,4%) á Suðurlandi. Minni fólksfjölgun var á Vesturlandi (0,1%) og Norðurlandi eystra (0,03%).

Fólksfækkun var á tveimur landsvæðum, Norðurlandi vestra þar sem fækkaði um 28 manns, eða 0,4% og á Suðurnesjum en þar fækkaði um 36, eða 0,2%.