Frændi Barack Obama var ólöglegur innflytjandi í Bandaríkjunum

Einn af frændum Baracks Obama Bandaríkjaforseta fær að vita fyrir árslok hvort honum verður vísað frá Bandaríkjunum sem ólöglegum innflytjenda.

Sá sem hér um ræðir heitir Onyango Obama og er 68 ára gamall hálfbróðir föður Bandaríkjaforseta. Hann kom til Bandríkjanna frá Kenía sem unglingur til þess að stunda nám í Bandaríkjunum.

Síðan hefur ekkert spurst til þessa manns fyrr en hann var handtekinn fyrir ölvun við akstur í Massachusetts í fyrra. Þá kom í ljós að hann var ólöglega í landinu.

Í bandarískum fjölmiðlum kemur fram að Onyango mun hafa sagt lögreglumönnunum sem handtóku hann að þetta væri ekki vandamál, hann þyrfti bara hringja í Hvíta húsið.

Frændi hans Bandaríkjaforseti hefur hinsvegar alfarið hafnað því að skipta sér af málefnum þessa ættingja síns. Raunar hefur talsmaður forsetans sagt að Barack Obama hafi ekki haft hugmynd um að þessi frændi sinni héldi til ólöglega í Bandaríkjunum.

Fram kemur í fjölmiðlum vestan hafs að systir Onyango hefur fengið landvistarleyfi í Bandaríkjunum eftir að hafa áður verið skilgreind sem ólöglegur innflytjandi.