Hjúkrunarfræðingur ól óvænt barn

Þrítug kona í Arizona í Bandaríkjunum kom af fjöllum þegar læknar tjáðu henni að hún væri þunguð. Andartaki síðar ól hún barnið.

„Ég hélt að þetta væru bara nýrnasteinar," sagði Janae Colvard í samtali við fjölmiðla vestanahafs. Læknar á bráðamóttöku tóku á móti Colvard í síðustu viku.

„Ég var spurð hvort að það væri mögulegt að ég væri ólétt. Ég sagði að það væri af og frá. En um leið og ég teygði höndina niður fann ég fyrir höfði barnsins," sagði Colvard.

Því næst ól Colvard heilbrigt stúlkubarn sem nú hefur verið skírð Isabel. Þó ótrúlegt megi virðast er Colvard hjúkrunarfræðingur að mennt en barnsfaðir hennar er Brian Ojinaga. Eðlilega var Brian nokkuð brugðið við þessar fréttir.

„Ég var nú ekki beint að búast við þessu," sagði Brian.

Hægt er að lesa nánar um málið hér.