Líklegt þykir að Norður-Kórea sprengi kjarnasprengju

Líklegt þykir að Norður-Kóreumenn sprengi kjarnasprengju í tilraunaskyni á næstu dögum.

Málgagn norður-kóreskra yfirvalda greindi frá því í morgun að Kim Jong-un, leiðtogi Norður-Kóreu, hefði fundað með hershöfðingjum landsins í vikunni. Samkvæmt fjölmiðlum í Norður-Kóreu var stækkun á herafla landsins rædd á fundinum. Að mati sérfræðinga er tilraun með kjarnasprengju talin vera rökrétt framhald af slíkum yfirlýsingum.

Norður-Kóreumenn hótuðu í síðasta mánuði að efla tilraunir sínar með kjarnorkuvopn og tilkynntu að slíkum aðgerðum yrði stefnt til höfuðs Bandaríkjamönnum. Yfirvöld vestanhafs voru í forsvari fyrir hertari refsiaðgerðir gegn Norður-Kóreu sem samþykktar voru í Öryggisráðinu snemma í síðasta mánuði.