Fidel Castro kaus í þingkosningunum á Kúbu

Það vakti athygli að Fidel Castro fyrrum leiðtogi Kúbu mætti á kjörstað í gærdag þegar þingkosningar fóru fram á eyjunni.

Fidel var í framboði til eins af þeim 612 sætum sem kosið var um. Hann náði örugglega kjöri eins og raunar allir sem buðu sig fram.

Kosningar þessar þykja mjög óspennandi því frambjóðendur eru jafnmargir og sætin sem eru í boði og engin kosningabarátta er leyfð.

Þó var talsverð endurnýjun í þessum kosningum því 67% frambjóðenda buðu sig fram í fyrsta sinn.

Fyrsta verk þingsins verður að endurkjósa Raul Castro sem forseta landsins.