Gasleki olli sprengingunni í Mexíkóborg

Rannsókn hefur leitt í ljós að sprengingin sem eyðilagði háhýsi olíufélagsins Pemex í Mexíkóborg í síðustu viku varð vegna þess að gas hafði safnast saman undir háhýsinu.

Eins og kunnugt er af fréttum fórust 37 manns í sprengingunni og yfir 100 manns slösuðust. Talið er að bilun í rafkerfi hússins hafi orsakað neistaflug sem kveikti í gasinu.

Ekki er alveg ljóst hvaðan gasið kom en talið að það geti hafa verið metangas úr holræsakerfinu sem liggur undir byggingunni.

Vegna sprengingarinnar hefur forseti Mexíkó lýst yfir þriggja daga þjóðarsorg í landinu.