George W. Bush málar myndir af baðherbergjum

Það hefur lítið farið fyrir George W. Bush, fyrrverandi forseta Bandaríkjanna, frá því að hann lét af embætti fyrir rúmum fjórum árum. Hann hefur engu að síður verið iðinn við kolann.

Fyrir nokkru braust tölvurefurinn Guccifier inn í tölvukerfi Bush-fjölskyldunnar og rændi þaðan ýmsum gögnum. Þar á meðal eru ljósmyndir og persónuleg gögn.

Það sem hefur vakið hvað mesta athygli eru tvær ljósmyndir sem Bush sjálfur tók af tveimur ókláruðum málverkum. Bush hefur augljóslega tekið ástfóstri við málaralistina. Svo virðist sem að baðherbergið sé honum sérstaklega hugleikið.

Fyrra verkið er fyrstu persónu sjónarhorn Bush þar sem hann liggur í baðkari og starir á sínar eigin tær. Á seinni myndinni má sjá Bush spóka sig fyrir framan baðherbergisspegil.

Málið hefur vakið mikla athygli vestanhafs en talsmaður Bush-fjölskyldunnar sagði í dag að tölvuþrjóturinn yrði látinn svara til saka.