Dönsk klámstjarna gerir upp fortíð sína

Þegar Katja Kean, ein af þekktustu klámmyndaleikkonum Dana í sögunni, var á toppi ferils síns eftir aldamótin notaði hún tæplega 1,5 milljónir króna á mánuði í dagleg útgjöld.

Þetta kom fram í sjónvarpsþættinum Lúxusgildran á TV3 í Kaupmannahöfn í gærkvöldi. Katja ákvað að hætta í kláminu árið 2004. Hún notaði það fé sem hún hafði unnið sér inn í klámmyndum til að stofna eigið fyrirtæki á sviði nærfataframleiðslu. Þar að auki tók hún verslun á leigu á besta stað í miðborg Kaupmannahafnar, það er á Bredgade, og jafnframt leigði hún lúxusíbúð á hæðinni fyrir ofan fyrir sig og kærasta sinn sinn.

Katja segir í sjónvarpsþættinum að hún hafi eytt sem svarar til 1,5 milljón kr. í mánaðarleg útgjöld þ.e. rúmlega 60.000 danskar kr. Af þessari upphæð var stærsti hlutinn húsaleiga eða um þriðjungur. Hún notaði einnig 150.000 kr. í bílakostnað, 250.000 krónur í mat og drykki og nærri 400.000 krónur í ýmsan kostnað svo dæmi séu tekin.

Þessum lífsstíl var ekki hægt að halda lengi áfram á klámgróðanum og árið 2008 varð Katja gjaldþrota. Það ár missti hún verslunina, íbúðina og kærastann. Síðan þá hefur hún meira og minna verið háð vinkonum sínum um uppihald. Hún segir að það eina sem hún á í dag sé reiðhjólið sitt.