Lagt til að lögleiða alsælu

Dómsmálaráðherra Kólumbíu segir að nýtt lagafrumvarp myndi lögleiða einkaneyslu verksmiðjuframleiddra lyfja svo sem e-töflunnar.

Frumvarpið kæmi í stað núverandi laga sem banna bæði kókaín og marijúana þótt fólk sé ekki sótt til saka fyrir að hafa lítið magn af efnunum í fórum sínum.

Eiturlyfjaneysla og viðskipti með eiturlyf hafa löngum verið útbreitt vandamál í Kólumbíu. Nýja lagafrumvarpið á að taka á þessu vandamáli þótt skiptar skoðanir séu um frumvarpið. Gagnrýnendur segja að lögleiðing verksmiðjuframleiddra lyfja geri vandamálið aðeins enn flóknara.

Cesar Gaviria, fyrrverandi forseti landsins, tilheyrir hópi sérfræðinga og vísindamanna sem leggja eiga mat á eiturlyfjalögjöf í landinu undanfarin tíu ár. Hópurinn kynnti vinnu sína fyrir, Ruth Stellu Correa, dómsmálaráðherra Kólumbíu, í gær.

Correa segir að Stjórnarskrárréttur Kólumbíu hafi þegar mælt gegn því að almenningi sé refsað fyrir að hafa lítið magn af marijúana og kókaíni í fórum sínum. Frumvarpið feli enga breytingu í sér hvað það varði.

„Nýja frumvarpið, sem lagt verður fyrir þingið, á að meitla það í stein og koma verksmiðjuframleiddum lyfjum undir sama hatt," segir Correa við fréttavef BBC.

Gagnrýnendur frumvarpsins hafa áhyggjur af því að heróín gæti, verði frumvarpið að lögum, fallið undir skilgreininguna á verksmiðjuframleiddum lyfju.