Verulega dregur úr fíkniefnaúrgangi á götum Kaupmannahafnar

Magnið af óhreinum sprautunálum og öðru sorpi tengt fíkniefnaneyslu á götum Kaupmannahafnar hefur minnkað um meir en helming.

Í umfjöllun danskra fjölmiðla um þessa jákvæðu þróun segir að hana megi alfarið rekja til þess að borgaryfirvöld ákváðu í október í fyrra að veita sprautufíklum aðstöðu með hreinum nálum til að sinna fíkn sinni.

Um er að ræða svokallað sprautuherbergi sem sett var á fót í Vesturbrúhverfinu en þar geta fíkniefnasjúklingar komið á hverjum degi vikunnar og fengið hreinar sprautur og nálar auk aðstöðu til að nota þær.

Áður en fyrrgreindu herbergi var komið á laggirnar var nam sprautu- og fíkniefnaúrgangurinn um 3,7 kílóum á dag. Eftir tilkomu þess hafa borgarstarfsmenn aðeins þurft að hreinsa að jafnaði um 1,6 kíló af notuðum sprautum og öðrum fíkniefnaúrgangi af götum og opinberum svæðum borgarinnar á hverjum degi.

Þar að auki segir einn af forstöðumönnum herbergisins að töluvert hafi dregið ótímabærum dauðsföllum sprautufíkla með tilkomu þess.