Barbra Streisand kemur fram á Óskarsverðlaunahátíðinni

Bandaríska söng- og leikkonan Barbra Streisand mun koma fram og taka lagið á Óskarsverðlaunahátíðinni í Los Angeles í næsta mánuði.

Þetta var tilkynnt í gærdag. Bandarískir fjölmiðlar sem fjalla um málið taka það fram að þetta er í fyrsta sinn undanfarin 36 ár að Barbra Streisand treður upp á þessari kvikmyndahátíð.

Síðast þegar það gerðist var 1977 þegar hún flutti ástarsönginn úr myndinni A Star is Born á hátíðinni það árið. Kvöldið sem þetta gerðist vann Streisand raunar Óskarinn fyrir lagið Evergreen sem þá var valið besta frumsamda lagið í kvikmynd.

Barbra Streisand, sem er rúmlega sjötug, er ekki með öllu ókunnug Óskarsverðlaunahátíðum. Hún vann verðlaunin sem besta leikkonan í aðalhlutverki árið 1969 fyrir leik sinn í myndinni Funny Girl og hefur þar með tvær styttur á hillu sinni. Þar að auki var hún tilnefnd til Óskarsverðlauna nokkrum sinnum á árunum frá 1973 til 1996 fyrir leik, leikstjórn og tónlist.

Aðstandendur Óskarsverðlaunanna eru í skýjunum yfir því að hafa fengið Barbra Streisand til að koma fram á hátíðinni í annað sinn í sögunni.