Ryanair þarf að greiða bætur vegna eldgossins í Eyjafjallajökli

Ryanair hefur verið dæmt til þess að greiða breskum farþega kostnað sem hann þurfti að standa straum af þegar öskuský úr Eyjafjallajökli stöðvaði alla flugumferð yfir Atlantshafið.

Það var Evrópudómstóllinn sem komst að þessari niðurstöðu og þýðir að flugfélaginu er skylt að bæta tjón sem farþegar urðu fyrir vegna tafanna.

Í þessu tilviki var um að ræða konu sem þurfti að greiða um 1100 evrur, eða um 200 þúsund krónur á núverandi gengi, í kostnað vegna 7 daga tafar sem skapaðist þegar eldgosið stöðvaði alla flugumferð.

Flugfélagið hélt uppi vörnum vegna málsins og sögðu að það væri ómögulegt að gera flugfélagið ábyrgt fyrir svo einstökum atburði og gosið var. Dómarar komust hinsvegar að þeirri niðurstöðu að slík tilvik leystu flugfélögin ekki undan ábyrgð.

Talsmaður Ryanair segir í viðtali við BBC að fjárhagslega áfallið sé þó ekki mikið, enda félagið þegar búið að greiða 27 milljónir evra í bætur til farþega sem urðu fyrir óþægindum vegna öskuskýsins. Þannig býst talsmaðurinn ekki við að fjöldi nýrra krafa muni líta dagsins ljós, en félagið vonaðist til þess að sigurinn myndi girða fyrir slíkar miskabætur í framtíðinni.