Verkalýðsfélag styður lögleiðingu marijúana vestan hafs

Stærsta verkalýðsfélag verslunarmanna í Bandaríkjunum styður lögleiðingu marijúana því félagsmenn þess hafa fengið þúsundir af störfum á stöðum sem selja fíkniefnið.

Hér er um að ræða verkalýðsfélagið United Food and Commercial Workers en það má muna fífil sinn fegri. Félagsmönnum þess hefur stöðugt fækkað á undanförnum árum m.a. vegna aðgerða einstakra ríkja þar sem Repúblikanar hafa farið með völd.

Raunar er félagið ekki eitt í þeirri stöðu í Bandaríkjunum því nýjar tölur sýna að skráðum meðlimum í verkalýðsfélögum fækkaði úr 11,8% af öllum starfandi mönnum í landinu árið 2011 og niður í 11,3% í ár.

Marijúana er löglegt til lækninga í 19 ríkjum Bandaríkjanna og löglegt til einkanota í tveimur ríkjum, Colorado og Washington. Í frétt um málið á Reuters segir að verkalýðsfélagið hafi barist hart fyrir lögleiðingu marijúana í þessum tveimur ríkjum en kosið var um lögleiðinguna samhliða síðustu forsetakosningum.

Þegar eru 3.000 meðlimir verkalýðsfélagsins starfandi á stöðum sem selja marijúana þar sem það er löglegt. Forráðamenn félagsins horfa til þess að stöðunum fjölgar stöðugt og þeir ráða einkum meðlimi félagsins til starfa.