Verkjalyf fyrir hesta leyndust í matvöru

Talið er að sex hrossaskrokkar hafi endað í matvælum í Frakklandi þrátt fyrir að merki um verkjalyf fyrir hesta hafi fundist í skrokkunum.

Matvælastofnun breska ríkisins á nú í samvinnu við frönsk stjórnvöld um að rekja hvert kjötið úr skrokkunum sex fór.

Á miðvikudaginn hvatti Evrópusambandið stjórnvöld í öllum aðildarríkjum til þess til að gera nákvæmar rannsóknir næstu vikurnar á unnum kjötvörum til að komast að því hversu mikið sé um að hrossakjöt sé selt sem nautakjöt.

Hrossakjötshneykslið, sem hófst í Frakklandi, hefur nú breiðst út til æ fleiri landa. Meðal annars hefur hrossakjöt fundist í hamborgurum á Írlandi og í Noregi hafa vörur verið fjarlægðar úr verslunum.

Flóknar viðskiptaleiðir með hráefni í matvæli torvelda alla yfirsýn og auðvelda framleiðendum að komast fram hjá reglum. Þannig hefur til dæmis hrossakjöt frá Rúmeníu á endanum lent í frosnu lasanja í breskum verslunum, eftir að hafa farið í gegnum fyrirtæki í Lúxemborg og Frakklandi.

Evrópulögreglan Europol er byrjuð að rannsaka hvort skipulögð glæpastarfsemi sé að baki matvörusvikum af þessu tagi.