Fundu fimm skammbyssur og skotfæri í Kristjaníu

Lögreglusérsveitin Task Force Pusherstreet lét til skarar skríða gegn fíkniefnasölum í Kristjaníu í gærdag.

Meðal þess sem lagt var hald á voru fimm skammbyssur, þar af tvær af gerðinni Glock og ein af gerðinni Heckler og Koch. Auk þess fundust tæplega 1.800 skot í þessar byssur og tvö skotheld vesti.

Þá náði sérsveitin töluverðu magni af hassi og marijúana í þessari aðgerð. Um var að ræða rúmlega 72 kíló af hassi, 22 kíló af marijúana og nærri 13.000 tilbúnar jónur.

Fimm einstaklingar voru handteknir en síðan sleppt að loknum yfirheyrslum.