Offitusjúklingur reyndist vera með risaæxli

Magaæxli, sem var 28 kíló að þyngd, var tekið úr sextugri konu í Þýskalandi á dögunum. Læknar segja að æxlið sé það stórt að það fylli upp í meðalstórar hjólbörur.

Umrædd kona heitir Irimtraud Eichler. Læknar höfðu áður sagt að hún væri offitusjúklingur, vegna þess hve æxlið óx hratt á skömmum tíma. Að sögn Daily Mail fékk hún því sérstök lyf til þess að berjast gegn offitunni. Dóttir hennar sætti sig ekki við stöðu mála og óskaði eftir því að málin yrðu skoðuð nánar. Það var þá sem í ljós kom að hún væri með æxli.

Á vef Daily Mail má sjá myndir af æxlinu.