Skattamál Helle Thorning Schmidt í brennidepli

Skattamál Helle Thorning Schmidt forsætisráðherra Danmerkur er aftur komið í sviðsljósið vegna máls sem tekið verður fyrir í réttarsal í Söborg í dag.

Málið er forsíðufrétt í öllum dönskum fjölmiðlum þennan morguninn en þar í landi er málið kallað Stóra skattamálið. Talið er að það gæti orðið jafnalvarlegt og Tamil málið var fyrir Poul Schlüter árið 1993 en Schlüter neyddist þá til að segja af sér sem forsætisráðherra, að því er segir í blaðinu BT.

Málið fjallar um það að upplýsingum var lekið til Ekstra Bladet um skattaframtal Helle Thorning Schmidt og eignmanns hennar Stephen Kinnocks í fyrra. Þar kom m.a. fram að Kinnock, sem er breskur ríkisborgari, greiðir ekki skatta í Danmörku heldur í Sviss þar sem hann vinnur og sparar sér þar með stórar fjárhæðir. Þau hjónin höfðu áður staðhæft að þau væru bæði búsett í Danmörku og borguðu skatta í samræmi við danskar reglur.

Réttarhöldunum í Söborg er m.a. ætlað að rannsaka með hvaða hætti Ekstra Bladet fékk upplýsingarnar í sínar hendur.

Málið kom upp í miðri kosningabaráttunni til danska þingsins í fyrra. Talið er að áhrifamenn innan Venstre hafi lekið upplýsingunum til blaðsins. Reynist það rétt er um alvarlegan glæp að ræða og gæti flokkurinn beðið mikinn skaða af því. Helst beinast spjótin að einum af spunameisturum Venstre en hann er einn af þeim sem kallaður verður fyrir réttinn nú fyrir hádegið.

Eins og kunnugt er kom Helle Thorning Schmidt í opinbera heimsókn til Íslands í gærdag en hún heldur síðan til Grænlands í dag.