Hættuleg björgun sjómanna við Suður Kóreu

Björgunarmönnum í Suður Kóreu hefur tekist með miklu harðfylgi að bjarga sex af þeim 30 kínversku sjómönnum sem saknað var í nótt eftir að tveimur skipum þeirra hvolfdi í fellibylnum Bolaven sem nú herjar við Kóreuskagann.

Skipin sukku skammt frá landi og óðu björgunarmenn út í fjallháar öldurnar þar sem sjómennirnir börðust fyrir lífi sínu. Björgunaraðgerðirnar halda áfram en fjölmiðlar í Suður Kóreau segja að enn sé hægt að sjá sjómenn á lífi í öldurótinu þar sem þeir hanga á ýmsu braki úr skipunum.

Síðustu fréttir herma að tekist hafi að koma björgunarlínu til þeirra og vonir standa til að fleiri verði bjargað.