Stöngin inn hjá Fabregas og Spánverjar í úrslit

Spænska karlalandsliðið í knattspyrnu tryggði sér í kvöld sæti í úrslitaleik Evrópumótsins í knattspyrnu eftir sigur á Portúgal í vítaspyrnukeppni í undanúrslitaviðureigninni.

Lui Patricio varði fyrstu spyrnu Spánverja sem Xabi Alonso tók. Spánverjar voru þó fljótir að taka gleði sína á ný þegar Iker Casillas varði spyrnu Joao Moutinho.

Andres Iniesta, Gerard Pique og Sergio Ramos skoruðu úr næstu þremur spyrnum Spánverja. Hið sama gerðu Pepe og Nani en þá var röðin komin að hægri bakverði Portúgala Bruno Alves.

Skot Alves small í þverslánni og Spánverjar í kjörstöðu. Ólíkt spyrnu Alves sem hrökk af slánni og út fór spyrna Cesc Fabregas af stönginni og inn. Spænskur sigur í höfn og Evrópumeistararnir eiga alla möguleika á að verja titil sinn.

Athygli vakti að Cristiano Ronaldo var ekki á meðal fyrstu fjögurra spyrnumanna Portúgala í vítakeppninni. Talið er að Ronaldo hafi átt að taka fimmtu spyrnu Portúgala sem aldrei kom til.

Leikur liðanna í Donetsk í kvöld olli nokkrum vonbrigðum. Portúgalar pressuðu Spánverja ofarlega á vellinum sem virtist setja þá spænsku útaf laginu.

Hvorugu liðinu tókst að skapa sér teljandi marktækifæri í fyrri hálfleik. Eina færið í venjulegum leiktíma féll fyrir Cristiano Ronaldo á lokamínútu leiksins.

Portúgalar brunuðu þá í skyndisókn eftir þunga sókn Spánverja. Boltinn var lagður á Ronaldo sem var í kjörstöðu vinstra megin í vítateignum en skot hans með vinstri fæti fór hátt yfir markið.

Ronaldo átti nokkrar tilraunir utan af velli en sem fyrr tekst Portúgalanum skotvissa ekki að skora utan vítateigs á stórmótum.

Andres Iniesta og Jesus Navas fengu fín færi í framlenginunni til að tryggja Spánverjum sigur en allt kom fyrir ekki. Úrslitin réðust svo í framlengingunni sem fyrr segir. Þetta er í fjórða skiptið sem Spánverjar komast í úrslit EM en þeir eiga titil að verja.

Á morgun kemur í ljós hverjir andstæðingar Spánverja í úrslitaleiknum verða. Þá mætast Þjóðverjar og Ítalir í Varsjá klukkan 18.45.