U23 ára stelpurnar gerðu jafntefli við Skota

Dagný Brynjarsdóttir og Elín Metta Jensen skoruðu mörk U23 ára landsliðs Íslands í 2-2 jafntefli gegn b-liði Skota í æfingaleik ytra í dag.

Íslenska liðið varð fyrir áfalli snemma leiks þegar Hlín Gunnlaugsdóttir þurfti að fara af velli vegna tognunar aftan í læri. Lára Kristín Pedersen tók stöðu hennar á miðjunni.

Skotar komust yfir á 16. mínútu með laglegu skoti úr vítateignum sem Bryndís Lára Hrafnkelsdóttir í marki Íslands réð ekki við.

Á 34. mínútu tók Dagný Brynjarsdóttir til sinna ráða. Hún vann þá boltann á miðjunni, geystist upp völlinn og skoraði með góðu skoti. Glæsilegt mark og staðan 1-1 í hálfleik.

Sigurður Ragnar Eyjólfsson, landsliðsþjálfari Íslands, gerði fjórfalda skiptingu snemma í síðari hálfleik og skömmu síðar komust íslensku stelpurnar yfir.

Elín Metta Jensen fékk þá boltann inni á vítateig Skotanna og skoraði með fínu skoti. Líkt og í viðureign A-landsliða þjóðanna í gær stefndi í íslenskan sigur þegar Skotar jöfnuðu með glæsiskoti af löngu færi, sláin inn.

Allir leikmenn íslenska liðsins fengu tækifæri í leiknum í dag.