Klaufalegt mark tryggði Celtic þrjú stig í opnunarleiknum

Skosku meistararnir í Celtic hófu titilvörn sína í Skotlandi á 1-0 sigri gegn Aberdeen á Parkhead í Glasgow í gær.

Kris Commons skoraði eina mark leiksins tíu mínútum fyrir leikslok með skoti af löngu færi eftir stutta hornspyrnu. Skotið var reyndar í slakari kantinum en ótrúlegur klaufagangur Jamie Langfield í marki Aberdeen varð þess valdandi að boltinn lak í netið.

Markið má sjá í spilaranum hér fyrir ofan.

Reiknað er með því að leið Celtic að skoska titlinum í ár og reyndar næstu þrjú árin verði greið í ljósi fjarveru erkifjendanna í Rangers.

Celtic átti í miklu basli með gestina frá Aberdeen en unnu samt sem áður sigur. Hvort það bendi til þess að Celtic fái allt upp í hendurnar í vetur eða fái samkeppni frá öðrum en Rangers á eftir að koma í ljós.

Rangers leikur sem frægt er orðið í fjórðu efstu deild í vetur þar sem félagið var tekið til gjaldþrotaskipta. Nágrannafélögin frá Glasgow hafa einokað deildakeppnina frá því á níunda áratugnum.