Nígerískur knattspyrnumaður lét lífið

Henry Chinonso Ihelewere, 21 árs gamall nígerískur knattspyrnumaður, fékk hjartastopp og hneig niður í æfingaleik í Rúmeníu í dag.

Reuters fréttastofan greinir frá því að Ihelewere hafi fallið til jarðar aðeins fimmtán mínútum eftir að hann kom inná sem varamaður í æfingaleik CS Delta Tulcea og FC Balotesti. Liðin leika í 2. deild rúmensku knattspyrnunnar.

Endurlífgun stóð yfir í um 50 mínútur en árangurslaust. Um 40 stiga hiti var á vellinum þar sem leikurinn fór fram. Leikmaðurinn hafði spilað í Rúmeníu frá árinu 2007.

„Hvað get ég sagt? Við erum öll í uppnámi," er haft eftir fyrrum þjálfara leikmannsins Christian Dulca.

„Ég þjálfaði hann í eitt og hálft ár og get sagt ykkur að hann var sýndi alltaf gott fordæmi á æfingum. Hann hefði getað orðið mjög góður leikmaður," sagði Dulca.