Kolbeinn í tapliði Ajax gegn PSV Eindhoven

Landsliðsmaðurinn Kolbeinn Sigþórsson var í fremstu víglínu Ajax sem beið lægri hlut 4-2 gegn PSV Eindhoven í árlegum leik um Johan Cruyff skjöldinn í dag.

Svíinn Ola Toivonen skoraði tvö marka PSV sem komst í 2-0 snemma leiks. Ajax minnkaði muninn fyrir leikhlé en Toivonen skoraði sitt annað mark og kom PSV í 3-1 snemma í síðari hálfleik.

Kolbeini var skipt af velli stundarfjórðungi fyrir leikslok en um það leyti minnkaði Ajax muninn á ný með sjálfsmarki. PSV tryggði sér svo sigur með marki á lokamínútunni.

Fyrsta umferð hollensku deildakeppninnar fer fram um næstu helgi. Þá taka Kolbeinn og félagar á móti Jóhanni Berg Guðmundssyni og félögum hjá AZ Alkmaar.