Stefán Gíslason á skotskónum | Ólafur Ingi í toppsætið

Stefán Gíslason skoraði annað marka Leuven í 2-2 jafntefli gegn Genk í efstu deild belgísku knattspyrnunnar í dag.

Manni færri komust gestirnir í Genk tveimur mörkum yfir þegar stundarfjórðungur lifði leiks. Þá minnkaði Stefán muninn áður en heimamenn jöfnuðu metin úr vítaspyrnu.

Leuven hefur eitt stig að loknum tveimur leikjum í Belgíu.

Þá var Ólafur Ingi Skúlason í byrjunarliði Zulte-Waregem sem lagði Gent 3-1. Ólafur fékk gult spjald í síðari hálfleik.

Ólafur og félagar hafa byrjað tímabilið vel en þeir deila toppsætinu með Club Brugge að loknum tveimur umferðum.