Skotar fá að kjósa um sjálfstæði 2014

Bretland, apForsætisráðherra Bretlands, David Cameron, og æðsti ráðherra Skotlands, Alex Salmond, hafa skrifað undir samkomulag um þjóðaratkvæðagreiðslu um sjálfstæði Skotlands.

Samkomulagið var undirritað í Edinborg í gær en samningaviðræður hafa staðið yfir mánuðum saman. Samkvæmt því munu Skotar fá að kjósa um það hvort Skotland eigi að verða sjálfstætt ríki eða ekki.

Þjóðaratkvæðagreiðslan mun fara fram haustið 2014.

Bresk stjórnvöld munu veita skoska þinginu völd til þess að halda þjóðaratkvæðagreiðsluna, en breska ríkisstjórnin ber ábyrgð á stjórnskipunarmálum.

Breska ríkisstjórnin og ríkisstjórn Skota munu þurfa að vinna saman með bestu hagsmuni almennings í Skotlandi í huga, sama hver niðurstaða kosninganna verður, að því er segir í samkomulaginu.

David Cameron sagði við fréttamenn í gær að hans meginmarkmið væri að halda Bretlandi sameinuðu.

„Ég hef alltaf viljað sýna skoskum almenningi virðingu. Almenningur kaus flokk sem vildi halda þjóðaratkvæðagreiðslu, ég hef gert það mögulegt og séð til þess að kosningarnar verði löglegar og sanngjarnar," sagði hann.

Hann sagðist vera sannfærður um að betra sé fyrir Skota að vera áfram hluti af Bretlandi, en jafnframt að það væri betra fyrir Bretland í heild.

Alex Salmond sagðist hins vegar fullviss um að Skotar myndu kjósa að verða sjálfstætt ríki. - þeb