Risavöxnu auga skolaði upp á strönd í Flórída

Risavaxið dökkblátt auga sem skolaði upp á strönd í Flórída hefur valdið vangaveltum hjá vísindamönnum um hvaða dýri eða fiski þetta auga hafi tilheyrt.

Augað sem hér um ræðir er hátt í 20 sentimetrar í þvermál og það var maður á gangi um Pompano ströndina í Flórída sem fann það fyrir helgina. Sá sem hér um ræðir heitir Gino Covacci og hann hefur sagt að þegar tók augað upp úr fjörunni hafi það verið ferskt og að enn hafi blætt úr því.

Gino setti augað í plastpoka og kom því í hendur Náttúruverndarráðs Flórída. Vísindamenn á vegum ráðsins rannsaka nú hvaða sjávardýri þetta auga hafi tilheyrt áður en því skolaði á land í Flórída.

Margar kenningar hafa verið settar fram eins og að augað hafi tilheyrt risakolkrabba, eða stórum sverðfisk. Einnig er sagt að augað gæti hafa tilheyrt túnfisk, hákarli eða hval.

Carli Segerson talskona Náttúruverndarráðsins segir að rannsóknin á því hvaða sjávardýri þetta auga hafi tilheyrt muni taka nokkurn tíma. Það eina sem sé á hreinu er að viðkomandi dýr eða fiskur hafi verið af stærri gerðinni.