Tímarit hefur birt nektarmyndir af Kate Middleton

Kate Middleton eiginkona William Bretaprins er með böggum hildar því franskt tímarit hefur birt myndir af henni berri að ofan. Breska konungsfjölskyldan er æf af reiði vegna þessara nektarmynda.

Mikið hefur verið fjallað um þetta mál í breskum fjölmiðlum í morgun. Tímaritið sem hér um ræðir heiti Closer og mun vera eitt helsta glans- og slúðurtímarit Frakklands. Það hefur birt myndir af Kate Middleton þar sem hún sést ber að ofan í sólbaði.

Myndirnar voru teknar á sveitasetri Lord Linley í Frakklandi í síðustu viku en Linley er frændi Elísabetar Bretadrottningar. Myndirnar eru mjög óskýrar og greinilega teknar af mjög löngu færi með aðdráttarlinsu.

Á vefsíðu BBC er haft eftir talsmanni konungsfjölskyldunnar að þau Kate og William séu miður sín, sorgmædd og vonsvikin yfir þessari árás á einkalíf sitt.

Blaðið Daily Mail segir að þau hjónin séu nú að íhuga málsókn gegn tímaritinu Closer. Í umfjöllun blaðsins segir að þau hjónin myndu að öllum líkindum vinna málið gegn tímaritinu þar sem Frakkland býr yfir einni ströngustu löggjöf um persónuvernd sem þekkt er í heiminum. Málið sé klippt og skorið þar sem þau Kate og William voru stödd á einkaeign þegar myndirnar voru teknar.