Ríkið ætlar að veita aukið fjármagn í Íbúðalánasjóð

Stjórnvöld stefna enn að því að leggja Íbúðalánasjóði til aukið eigið fé svo að eiginfjárhlutfall hans verði að lágmarki 5 prósent. Þetta kemur fram í svari fjármálaráðuneytisins við fyrirspurn Fréttablaðsins. Til þess þarf sjóðurinn að fá um tíu milljarða króna. Ekki hefur verið ákveðið hvenær féð verður lagt til en Sigurður Erlingsson, framkvæmdastjóri Íbúðalánasjóðs, sagði í Fréttablaðinu fyrr í þessum mánuði að rætt hafi verið um að eiginfjárframlagið yrði reitt fram á þessu ári. Á fjárlögum þessa árs er ekki gert ráð fyrir auknu framlagi til sjóðsins úr ríkissjóði.

Í ársreikningi Íbúðalánasjóðs, sem var birtur nýverið, kom fram að eiginfjárhlutfall sjóðsins sé 2,3 prósent. Samkvæmt reglugerð um starfsemi sjóðsins á langtímamarkmið hans að vera að hlutfallið sé yfir 5 prósent. Það hefur ekki verið svo hátt frá því um mitt ár 2008, eða í tæp fjögur ár.

Í svari fjármálaráðuneytisins við fyrirspurn Fréttablaðsins segir að stjórnvöld hafi boðað að til standi að leggja sjóðnum til aukið eigið fé og að miðað sé við að hann muni í kjölfarið uppfylla langtímamarkmið sitt. „ Ekkert hefur verið ákveðið enn sem komið er um hvenær eigið fé sjóðsins verði aukið, en það ræðst fyrst og fremst af því hvenær liggur fyrir hver endanleg fjárþörf sjóðsins er. Sjóðurinn hefur staðið í ströngu við endurskipulagningu og úrvinnslu skuldamála hjá viðskiptamönnum sjóðsins, bæði einstaklingum og lögaðilum. Núna er ekki er ljóst hvenær því verkefni lýkur en þá verður hægt að áætla fjárþörf sjóðsins.“

Íslenska ríkið lagði Íbúðalánasjóði til 33 milljarða króna í lok mars 2011 til að styrkja eiginfjárstöðu sína. Það framlag var nær allt fært inn á afskriftareikning til að mæta viðbúnum útlánatöpum sjóðsins. Því nýttist framlagið ekki til að auka eiginfé hans. Alls voru 8,3 milljarðar króna af útlánum sjóðsins afskrifaðir endanlega í fyrra, að mestu vegna 110 prósent-leiðarinnar svokölluðu. Auk þess voru 21,8 milljarðar króna á afskriftarreikningi sem sjóðurinn reiknar með að hann þurfi að nýta í frekari afskriftir.

thordur@frettabladid.is