Í haldi lög­reglu eftir fjölskylduerjur í Garða­bæ

126 mál voru skráð í kerfi lögreglunnar í dag og voru fjórir vistaðir í fangageymslu síðdegis samkvæmt dagbók lögreglu. 

Lögreglu barst tilkynning á þriðja tímanum um líkamsárás í Garðabæ. Þetta staðfestir lögregla í samtali við Vísi. Mennirnir séu feðgar og hafi báðir verið handteknir eftir heimilisófrið og séu báðir vistaðir í fangaklefa. 

Meðal annarra tilkynninga voru tvö innbrot í miðbæ Reykjavíkur og þau séu í rannsókn. 

Lögreglu barst tilkynning um krakka í Breiðholti sem höfðu stundað dyraat í vetur og nú fram á sumar. Íbúar séu margir orðnir langþreyttir á ástandinu.

Einnig hafði lögregla afskipti af manni í annarlegu ástandi í hverfi 105 sem reyndist vera með þýfi úr innbroti í fórum sínum. Sá hafi verið handtekinn og vistaður í fangaklefa.