Sara nýr formaður Stúdentaráðs

Sara Sigurðardóttir var kjörin nýr formaður Stúdentaráðs Háskóla Íslands á skiptafundi ráðsins í dag og hefur hún nú tekið við störfum af Lilju Dögg Jónsdóttur, fráfarandi formanni. Sara er oddviti Vöku sem vann meirihluta í Stúdentaráði fyrr í þessum mánuði. Hún er nemi við stjórnmálafræðideild og stefnir á að útskrifast vorið 2013.

Í tilkynningu segir að Sara telji mikilvægt að Stúdentaráð haldi áfram að berjast fyrir samþykkt á lagabreytingum um Lánasjóð íslenskra námsmanna, sem meðal annars feli í sér styrk til námsmanna.

„Einnig leggur Sara áherslu á endurheimtingu upptökuprófa við allar deildir háskólans og að breyttu fyrirkomulagi Stúdentaráðs verði framfylgt og það kynnt bæði fyrir nemendum og starfsfólki skólans," segir í tilkynningunni.