Demókratar styðja Santorum í Michigan

Spenna er fyrir forkosningar Repúblikana í Michigan sem fram fara í dag en þeir Mitt Romney og Rick Santorum eru hnífjafnir í skoðanakönnunum. Forkosningar fara einnig fram í Arizona en þar þykir Romney hafa yfirburðastöðu.

Mikil pressa er hinsvegar á Romney í Michigan. Það er talið hans heimaríki en þar ólst hann upp á meðan faðir hans George gegndi embætti ríkisstjóra. Sigri Romney í Michican telja sérfræðingar góðar líkur á því að honum takist að tryggja sér útnefningu flokksins til að bjóða sig fram til embættis forseta en fari Santorum með sigur af hólmi mun það hrista all verulega upp í baráttunni.

Santorum hefur á síðustu metrunum fengið óvæntan liðsstyrk, en demókratar í Michigan hafa farið í herferð og hvetja flokksbræður sína til að kjósa Santorum, sem er afar hægri sinnaður. Þei meta það því sem svo að Santorum væri auðveldari andstæðingur fyrir Obama forseta í komandi forsetakosningum og því kæmi það sér vel fyrir hann ef Santorum hreppi tilnefninguna.

Í Michigan er um opið prófkjör að ræða og í síðustu forkosningum voru demókratar um sjö prósent af þeim sem tóku þátt. Þeir gætu því ráðið úrslitum á kjördag í ljósi þess hve barátta þeirra Romney og Santorum er jöfn.