Hanna Birna nýtur mests trausts

Hanna Birna Kristjánsdóttir, oddviti Sjálfstæðisflokksins í borgarstjórn Reykjavíkur, nýtur mests stuðnings í embætti borgarstjóra að því er fram kemur í nýrri könnun sem Capacent Gallup vann fyrir borgarstjórnarflokk Sjálfstæðisflokksins.

Alls segjast 51,7 prósent svarenda treysta Hönnu Birnu best af oddvitum flokkanna í borgarstjórn. Næstur henni kemur Dagur B. Eggertsson, oddviti Samfylkingarinnar, sem 23,6 prósent segjast treysta best. Þá segjast 19,5 prósent treysta best Jóni Gnarr, borgarstjóra og oddvita Besta flokksins, og 5,1 prósent treystir Sóleyju Tómasdóttur, oddvita Vinstri grænna, best.

Þá nýtur Sjálfstæðisflokkurinn langmests fylgis í borginni ef kosið væri nú, samkvæmt könnun Capacent Gallup, en flokkurinn mælist með 43,1 prósents fylgi í könnuninni. Meirihlutaflokkarnir í borgarstjórn, Besti flokkurinn og Samfylkingin, koma næstir og mælast með 23,3 prósenta og 18,8 prósenta fylgi.

Vinstri grænir mælast með 7,7 prósenta fylgi og Framsóknarflokkurinn með 3,4 prósenta fylgi sem myndi ekki nægja til að fá borgarfulltrúa. Þá segjast 3,7 prósent svarenda myndu kjósa annan flokk.

Alls var haft samband við 1.500 Reykvíkinga á kosningaaldri og var svarhlutfall 64,3 prósent.- mþl