Capello: England mun ekki komast í úrslitaleikinn

Það verður eflaust sérstakt fyrir Fabio Capello, fyrrum landsliðsþjálfara Englands, að fylgjast með leik fyrrum lærisveina hans gegn heimalandinu, Ítalíu, í átta liða úrslitum EM.

"Það berjast um í mér ýmsar tilfinningar. Ég get ekki neitað því," sagði Capello sem kom enska landsliðinu á EM áður en hann hætti með það.

"Það er erfitt að gleyma því að ég var þjálfari enska liðsins í fjögur ár."

Capello hefur þó ekki trú á því að hans gömlu lærisveinar komist alla leið í úrslitaleikinn.

"Ég er alveg klár á því að Spánn og Þýskaland muni spila úrslitaleikinn. Þetta eru tvö langbestu liðin á þessu móti."