Cameron andvígur lagasetningu

David Cameron, forsætisráðherra Bretlands, fellst ekki á meginniðurstöðu rannsóknarnefndar Brians Leveson, sem leggur til að sett verði lög um eftirlit með fjölmiðlum í Bretlandi.

Hann segir mikilvægara að tryggja frelsi fjölmiðla og leggur til að fjölmiðlar landsins komi sér sjálfir hið fyrsta upp öflugri eftirlitsnefnd, sem passar að blaðamenn brjóti ekki á einstaklingum til að ná sér í æsifréttir.

Leveson kynnti í gær skýrslu nefndar sinnar, sem hefur í heilt ár verið að rannsaka brot breskra fjölmiðlamanna sem meðal annars stunduðu hleranir á símtölum.

Hann sagði niðurstöðu nefndarinnar vera þá að framferði fjölmiðla hefði í mörgum tilvikum verið fyrir neðan allar hellur. Þess vegna væri nauðsynlegt að setja lög sem koma í veg fyrir að fjölmiðlarnir valdi fleiri einstaklingum tjóni.

Hann sagði reyndar líka nauðsynlegt að tryggja frelsi fjölmiðlanna, en mælti með því að stofnuð yrði nefnd, skipuð bæði fræðimönnum og fyrrverandi blaðamönnum til að hafa eftirlit með fjölmiðlunum, en í þeirri nefnd mættu hvorki sitja stjórnmálamenn né starfandi yfirmenn á fjölmiðlum.